Вялікі князь Гедымін — годны герой новага нумара «Нашай гісторыі». Выдатны ваяр, але і тонкі дыпламат, які падняў эканоміку краіны. Увогуле, гэты нумар вас натхніць.

Клецкая бітва — бліскучая перамога нашых продкаў. А таксама выдатны прыклад хуткага і дружнага дзеяння ў крытычнай сітуацыі.

Калі браць іншыя тэмы, то вас чакае выдатны артыкул Вячаслава Насевіча «Узлёт Акулічаў і расправа над імі». Чытаеш — і бачыш Беларусь, якой бы яна магла быць, калі б не вынішчылі самых прадпрымальных.

У рубрыцы «Нацыянальная геаграфія» пра Унорыцу, рай над Дняпром, мілае сэрцу радавое гняздо піша Ганна Севярынец.

Таўканіца, крышаны, гарбузовая каша. Доктарка філалагічных навук Ганна Кісліцына ўспамінае радасці і стравы дзяцінства, якое прайшло ў Драгічыне.

Крохкія сімвалы дзяржаўнасці. Пра статуснае сталовае шкло піша доктар гісторыі Алесь Белы.

Сухі — Сухій — Сухой. Геніяльны авіяканструктар быў беларусам, а ягоны брат распаўсюджваў «Нашу Ніву»… Расказвае падпалкоўнік Мікалай Кавалёў.